Ny faha 30 Aprily 2025 teo dia nanatanteraka hetsika lehibe momba ny fambolena honko ny tao amin’ny Kaominina Ambonivohitry Maintirano, Fokontany Namela izay hetsika natao mba ho hanarenana sy hampiroboroboana indray ireo toeram-pambolena honko, izay singa manan-danja amin’ny tontolo iainana amoron-dranomasina.
Ny ekipan’ny Fitaleavam-Paritry ny Jono sy ny Toekarena Manga (DRPEB) Melaky niaraka tamin’ny solontenan’ny Vondrona Olona na Ifotony (VOI) tao an-toerana izay miisa 23 teo no niaraka nisalahy tamin’ity fambolena honko ity ary ny World Wide Fund for Nature (WWF) no nanohana ara-bola sy fitaovana.
Nandritra ny telo andro nanaovana ny fambolena ka zana-honko miisa 43 000 no novolena tamin’ny velaran-tany mirefy 5 hektara.