Kaominina Ambanivohitra Analalava,Distrikan’Analalava,Faritra Sofia
Atrikasan’ny Komity marolafy
Iray amin’ireo vokatra mampalaza an’i Madagasikara ny makamba.Nasian’ny Ministera ny Jono sy ny Toe-karena Manga MPEB fanavaozana ny fitrandrahana io vokatra io nanomboka ny taona 2021,isan’izany ny fanomezan’ny mpanjono indostrialy tohana hoan’ny mpanjono madinika eny ifotony araka ny voarakitra ao anatin’ny bokin’andraikitra ifanaovany amin’ny mpanjono vaventy. Orinasa telo no miasa aty amin’ny fari-panjoana B (Sofia sy Boeny) ka ny Pêche Export no manana zo hitrandraka »droit d’exploitation » miara-miasa amin’ny Somapeche sy Refrigepeche Ouest.Ny tohana avy amin’izy ireo no ahafahana manao ny fanofanana ny mpanjono hampiroboroboana ny vadinasany,ny fambolena zanaka honko,famoronana sy fampitaova ny faritra arovana andranomasina ary ny fizarana fitaovana enti-manjono. Araka izany dia notanterahina eto analalava androany faha 16 Mey 2025 ny atrikasan’ ireo mpikambana mandrafitra ny komity marolafy ahitana ny ekipa avy amin’ny MPEB,ny avy amin’ny faritra Sofia,ny solontenan’ny DREED Sofia,ary ny fiarahamonim-pirenena. Nialohavan’ny fitsidihana arapomba fanajana ny tomponandraiki-panjakana nampahafantarana ny zavatra hatao sy ny antony ahatongavana eto antoerana. Natao izao hanombanana ny asa vita tamin’ny taon-dasa sy ametrahana ny vinan’asa hatao amin’ity taona 2025. #MPEB #DRPEB_SOFIA #DREDD #REFRIGEPECHE_OUEST #Pêche_Export #Somapeche #Komity_Marolafy #Jono_Makamba
Ampandrianomby, Antananarivo
FIFANAOVAN-TSONIA FIARAHA-MIASA EO AMIN’NY DIRECTION GENERALE DES DOUANES, REPOBLIKAN’I SINA SY NY MPEB, MADAGASIKARA
Tontosa teto Ampandrianomby, Antananarivo anio faha 15 Mey 2025 ny fifanaovan-tsonia fifanaraham-piaraha-miasa eo amin’ny Direction Générale des Douanes de Chines sy ny Ministeran’ny Jono sy ny Toekarena Manga (MPEB). Ity fiaraha miasa ity dia nanamafy ny fifandraisana ara-toekarena sy ara-barotra eo amin’ny roa tonta, indrindra amin’ny sehatry ny fanondranana trondro an-dranomasina « haingo » (poissons marins ornementaux) avy eto Madagasikara makany Sina. Nisolo tena ny Repoblika Entimbahoakan’i Sina Atoa M. WANG Lingjun Vice-ministre de l’Administration Génerale des Douanes de Chine (GACC), ary Atoa Tilahy Desiré, Sekretera Jeneralin’ny MPEB. Araka ny fifanarahana, ireo trondro voalaza etsy ambony izay aondrana dia tsy maintsy mandalo fitsirihana ara-pahasalamana, miaraka amin’ny fihibohana fara fahakeliny 48 ora, izay araha-mason’ny Autorité Sanitaire Halieutique na #ASH mialohan’ny handefasana azy ireo. Ireo fepetra ireo dia napetraka mba hiantohana ny fanarahan’ny vokatra malagasy ny fenitra iraisam-pirenena. Maharitra dimy taona eo ny fifanarahana ary azo havaozina araka ny filàn’ny roa tonta. Anisan’ny vokatra hazan-drano aondrana any Sina ny dingadingana efa maina, ny horita, ny makamba , ny oratsimba , ny amalona ary ny trondro isan-karazany . Raha ny antontan’isa tamin’ny taona 2024 teo ohatra dia nahatratra 3.900 Taonina ny totalin’ny vokatra hazan-drano naondranan’i Madagasikara makany Sina, izay maneho ny maha-zava-dehibe ny sehatry ny jono ho an’ny toekarena malagasy. Ity fiaraha-miasa ity dia tsy vitan’ny manamafy ny fifandraisana ara-toekarena eo amin’i Madagasikara sy Sina, fa mandrisika ihany koa ho an’ireo mpamokatra sy mpanjono Malagasy hanatsara ny vokatra omeny ary hanitarana ny fidirana amin’ny tsena iraisam-pirenena. #MPEB #ASH #SINA #GACC
Toliara, Faritra Atsimo Andrefana
Atrikasa momba ny « Planification stratégique et opérationnelle du plan de gestion et de développement de la Réserve de Biosphère (RB) Tsimanampetsotse Nosy-Ve Androka dans le paysage marin Mahafaly »
Notanterahina ny 13 May 2025 tao Toliara ny atrikasa momba ny « Planification stratégique et opérationnelle du plan de gestion et de développement de la Réserve de Biosphère (RB) Tsimanampetsotse Nosy-Ve Androka dans le paysage marin Mahafaly ». Izay efa nahazo fankatoavana tamin’ny « UNESCO » tany amin’ny taona 2018. Telo andro ny faharetan’ny atrik’asa izaye niompana betsaka tamin’ny fakan-kevitra an’ireo tompon’andraikitra eny ifotony ny amin’ny IRAKA sy ny VINA andrasana amin’ny antom-pisian’ny RB izay niarahana namolavola (approche participative).Izay lalana handrafetana ny drafim-pitantanana sy ny fanajariana hiarovana ny rohy voahary ho afaka hamokatra hamaly ny hamaly manodidina amin’ny fomba maharitra ho lovain-jafy. Nanatrika izany moa ny solontenan’ny Prefektiora, ny DRPEB sy ny SREB, ny ekipan’ny BCPA sy ny ekipan’ny WWF, ny solontenan’ny DREDD, ny Talen’ny MNP sy ny ekipany, ny avy ao amin’ny ORTU ary ireo mpisehatra rehetra izay voakasik’io RB io. Marihina moa fa BCPA no mpanamahay voatendrin’ny WWF hanao ny asa. #MPEB #DRPEB #Atsimo_Andrefana #BCPA #WWF
Kaominina ambanivohitra Djangoa Distrikan’Ambanja, Faritra DIANA
Fanjohiana ny tohana nomena ireo fikambanana mpanjono
Anisan’ireo nahazo tohana avy amin’ny Orinasa mpanjono makamba Refrigepeche Ouest miasa amin’ny fari-panjonoana A ny fikambanan’ny mpanjono ao Djangoa. Ho fanjohiana ny mahakasika izany dia nidina tany an-toerana ireo komity marolafy androany 14 mai 2025 izay notarihin’Andriamato RAZAFIMANDIMBY Jean Chrysostophe tale Jeneralin’ny Jono sy ny Famokarana anaty rano. Hita nandritra izany fa nipaka any amin’ireo mpanjono tokoa ny tohana nomen’ny Orinasa toy fanomezana « glacière » miisa 4, harato 10 isa, »palangre « 1. Ankoatr’izay dia Mpanjono sy vadina Mpanjono miisa 60 no nofanina tamin’ny fiompiana trondro sy gana,ary nomena teknikam-panjonoana vaovao. Notanterahina tamin’izany ihany koa ny fitsidihana ny « complexe de pêche » vao naorin’ny Minisitera. Mihodina sy miasa tsara ny foto-drafitrasana nohon’ny fahaizan’ireo mpanjono ao an-toerana mitantana azy.Tsy adino moa ny namatsy zanaka gana hoan’ ireo vadin’ny mpanjono efa voaofana. #MPEB #DRPEB_DIANA #REFRIGEPECHE_OUEST #Komity_Marolafy #Jono_Makamba #Mpanjono
Madagascar National Parks – Nosy Hara Vahilava, Kaominina Ambanivohitra Andranovondronina, Distrika Antsiranana II, Faritra Diana
Fisokafan’ny Jono
Tamin’ny 12 Mey 2025 no nanombohan’ny vanim-potoana fanjonoana horita tao amin’ny Faritra Arovana Nosy Hara, izay tantanan’ny Madagascar National Parks (MNP). Vokatra milanja 36,544 taonina no azo tamin’ny andro voalohany nisokafan’ny jono izay nahitana fahombiazana lehibe ho an’ny mpanjono ao an-toerana. Anisan’ny zava-nisongadina tamin’ity fisokafana ity ny fahitana horita iray milanja 4 kilao, izay nampiseho ny haben’ny horita hita ao amin’ity faritra ity. Ankoatra izany, nahavita nanangona horita hatramin’ny 80 kilao ny mpanjono tamin’io andro io, izay porofon’ny harena sy ny fahombiazan’ny fitantanana maharitra ny Nosy Hara eo ambany fiahian’ny MNP. Ny Faritra Arovana Nosy Hara, hita ao amin’ny Faritra Diana, dia tsy vitan’ny manome fivelomana ho an’ny mponina ao amin’ny Kaominina Ambanivohitra Andranovondronina sy ny Distrika Antsiranana II, fa koa mitana anjara toerana lehibe amin’ny fiarovana ny tontolo iainana an-dranomasina sy ny fampiroboroboana ny fizahan-tany ara-tontolo iainana. Ny fisokafan’ity vanim-potoana fanjonoana ity dia manamarika ny fandraisana anjara lehibe amin’ny fampandrosoana ara-toekarena eo an-toerana, sady miantoka ny fitandroana ny fifandanjana eo amin’ny tontolo iainana sy ny asa fiveloman’ny mpanjono. Mbola hitohy ny fanaraha-maso mba hiantohana ny fanjonoana maharitra, mifanaraka amin’ny fitsipika napetraka ho fiarovana ny harena voajanahary ao Nosy Hara. #MPEB #DRPEB_Diana #Jono_horita
Faritra Diana, Distrikan’Ambanja, Kaominina Ambonivohitra Ambanja
Atrikasan’ny Komity Marolafy mahakasika ny Jono Makamba.
Notanterahina androany faha 13 Mey 2025 teto Ambanja ny atrikasa fanaon’ireo komity marolafy izay ahitana ireo solontena avy amin’ny Ministeran’ny Jono sy ny Toekarena Manga (MPEB) ny solontenan’ny Faritra Diana ny avy amin’ny Fitaleavam-paritry ny Tontolo Iainana sy ny Fampandrosoana Lovain-jafy ny solontenan’ny mpanjono, ary ny avy amin’ny fiarahamonim-pirenena. Ity atrikasa ity dia natao hanombanana ny asa vita nandritry ny taona 2024 ary koa hankatoavana ny vinan’asa ho tanterahina amin’ity taona 2025 ity. Tonga nanokatra ity atrikasa ity teto an-toerana A/toa RAZAFIMANDIMBY Jean Chrisostophe, Tale Jeneralin’ny Jono sy ny Famokarana Anaty Rano eto anivon’ny Ministeran’ny Jono sy ny Toekarena Manga. Arak’izany ity fotoana ity dia hifantoka amin’ny fandinihana sy ny fiadian-kevitra momba ny voarakitra ao anatin’ny bokin’andraikitra ifanaovan’ny ministera sy ny orinasa REFRIGEPECHE OUEST izay orinasa mpanjono manana fahazoan-dalana hitrandraka makamba ao amin’ny fari-panjonoana A (Zone de Pêche A). Anisan’ny zava-dehibe hapetraka ny tamberin’andraikitra omena ireo mpanjono madinika, indrindra ireo mivondrona anaty fikambanana ka isan’izany : Fanatsarana ny tontolo iainana, amin’ny alalan’ny fambolena zanaka honko sy ny famoronana ary fampitaovana ireo faritra arovana an-dranomasina (Aire Marine Protégée – AMP). Fanomezana tohana ara-pitaovana toy ny kojakoja enti-manjono, fanofanana ny mpanjono hampiasa fomba fanjonoana vaovao (formation palangre) ary koa fanohanana ny vadin’ny mpanjono mikasika ny fiompiana trondro sy gana. Ny tanjona dia ny hiantohana fa misy fiantraikany mivantana eo amin’ny mpanjono madinika eny ifotony ny vokatry ny fitrandrahana ataon’ireo mpanjono indostrialy. Ankoatra izay, misy ihany koa ireo hetsika fampiroboroboana ny fari-piainan’ny mpanjono madinika, toy ny fampitomboana ny vola miditra ho azy ireo sy ny fampihenana ny fitrandrahana tafahoatra ny vokatra makamba, mba hiantohana ny faharetan’ny harena an-dranomasina. #MPEB #DRPEB_DIANA #REFRIGEPECHE_OUEST #Komity_Marolafy #Jono_Makamba
Nosy Be, Faritra DIANA
Fanamafisana ny ady amin’ny Jono INN.
Efa tafaverina avokoa ireo « Inspecteurs des pêches » miisa 5 an’ireo Nosy mpikambana ato amin’ny Vaomieran’ny ranomasimbe Indiana rehefa avy namita asa fisafoana ny jono tato anatin’ny fari-dranomasina niaraka tamin’ny sambo mpanara-maso ny Jono. Anisany nentina nanatanteraka izany asa fisafoana izany ny Sambo Telonify an’i CSP Mahajanga izay efa nahavita mialoha raha ny 11 Mey 2025 kosa nahavita izany ny sambo mpanaramaso frantsay OSIRIS II. Seychellois miisa 2, Kaomoriana miisa 2, Maorisiana 1 ary Malagasy 1 ireo avy namita iraka ireo niaraka tami-drizareo tompon-tsambo izay naharitra 20 andro. Miisa 11 ireo sambo nanaovana fisavana tato anaty ny fari-dranomasin’i Madagasikara: « 6 chalutiers », « 2 ligneurs », « 1 senneur », « 1 collecteur » ary « 1 navire fileyeur ». Iray no fandikan-dalana tratra, dia fanjonoana tsy nahazo alalana ho an’ny sambo mpanjono salantsalany malagasy izay nampiasa harato 30 x 100 m. Fehiny dia azo lazaina fa tena nihena ny tahan’ny Jono INN tato amin’ny Fari-dranomasin’i Madagasikara nandritra ny fisafoana izay natao. #MPEB #COI #ECOFISH #CSP #OSIRIS_II #PRSP #64ème_mission_PRSP #Jono #INN
Agnilobe Kaominina Amporoforo, distrika Farafangana, Faritra Atsimo Atsinanana
fanarahamaso sy fanolokoloana ireo fambolen-kazo
Notontosaina ny 09 Mai 2025 ny fanombohana amin’ny fomba ofisialy ny fikolokoloana sy fanarahamaso ireo zanakazo novolena ho an’ny faritra Atsimo Atsinanana. « Ny ala velona no antoka ho an’ny hoavitsika rehetra », « Hamela lova tsara ho an’ny taranaka aho »; ireo no loha-hevitra sy teny filamatra nanentanana nandritra izany. Isan’ireo sokajin’olona maro samy hafa nandray anjara tamin’izany ny DRPEB Atsimo Atsinanana izay notaritin’Atoa Préfet ny Farafangana sy ny fitaleavam-paritra miadidy ny tontolo iainana Atsimo Atsinanana. #MPEB #DRPEB #Atsimo_Atsinanana
Nosy Fiji
Fifampizarana traikefa sy paikady ho an’ny fiarovana ny fari-dranomasina
Firenena Afrikanina miisa dimy no nitsidika an’i Nosy Fiji ny 4 hatramin’ny 8 mey lasa teo. Anisan’izany i Madagasikara. Anisan’ny tanjon’izy ireo ny hahafantatra ny fomba fiarovan’ny mponina any Fiji ny ranomasina sy ny harena anaty rano. Anisan’ny tetikasa « Fari-dranomasina Lehibe » na « Grand Paysage Marin » io fitsidihana io, izay mikendry ny fitantanana maharitra ny fari-dranomasina. Izy io dia hanampy ny mponina hiaina sy hivelona amin’ny harena an-dranomasina nefa manaja sy miaro azy ihany koa. Tanjona iray koa ny hahatratrarana ny vinan’ny Rindrina Manga Lehibe : ny fiarovana 30%-n’ny ranomasina amin’ny taona 2030. Nitsidika tanàna, nifampizara traikefa sy nanomana Volavolan-Tari-dalana ho an’ny firenena tsirairay izy ireo. Ny Tale Jeneralin’ny Toekarena Manga, Rado Rakotosoa, no nitarika ny delegasiona malagasy. Marihina fa notohanan’ny Conservation International, ny UICN ary ny Mission Inclusion Canada ity fitsidihana ity. # MPEB #Fifanakalozana_Paikady_Fiarovana_Faridranomasina_Toekarena_Manga_CI_UICN_Mission_Inclusion_Canada #Fiji
Antsiranana, Faritra Diana
FAMPIOFANANA FIOMPIANA TRONDRO HOAN’NY FIVAPOVA
Tontosa ny faha 09 mai 2025 teo antampon-tanànan’ny Antsiranana I, tao amin’ny efitrano malalaky ny Fitaleavamparitry ny Filaminambahoaka DIANA ny fampihofanana an’ireo mivondrona anatin’ny « Fikambanan’ny vadin’ny polisy sy polisy vehivavy »na FIVAPOVA izay tarihin-dRtoa Hoby RANDEFIMAMPIANINA , mikasika ny fiompiana trondro, izay manomboka amin’ny fanamboarana dobo sy momba ny fiompiana trondro anaty dobo na ivelan’ny tany, ary koa ny fanamboarana sakafon- trondro. Miisa 36 ireo izay nisitraka izao fiofanana izao ary nanome voninahitra izao fihofanana izao Commissaire Principal de Police RABEARIVONY Joël Izay Talemparitry ny Filaminambahoaka ao amin’ny Faritra DIANA sy Ramatoa vadiny, izay filohamboninahitry ny FIVAPOVA DIANA, tao koa ireo lehiben’ny sampan-draharaha ato anaty ny polisim- pirenena. Santatra ambavarano ihany izy ity, fa Mbola misy koa ny andiany faharoa, dia ny fidinana ifotony hanaovana fampiharana amin’ireo toerana efa misy fiompiana trondro, mba hipàka tsara ny fiofanana izay vao norantovana androany. Izao no natao, mba ho fanatrarana ny vina napetraky ny fitondram-panjakàna, dia ny fahavitan-tena ara-tsakafo, amin’ny alalan’ny fiompiana trondro andranomamy. #MPEB #DRPEB_Diana #DRSP_Diana #Fampamokarana_ny_Atirano