Auteur/autrice : MAYA RAKOTOMAHEFA

Kaominina Anosy Tsararafa, distrika Farafangana: Tohana ara teknika ho an’ny mpiompy trondro.

Iray amin’ireo mpiompy trondro nisitraka ny fiofanana amin’ny fiompiana trondro nomen’ny ekipan’ny DRPEB Atsimo Atsinanana Atoa Fabrice izay mipetraka ao amin’ny Kaominina Anosy. Resy lahatra tanteraka amin’ny fiompiana trondro izy ka vonona ny hiroso amin’ny sehatry ny matihanina kokoa. Maniry ny hanitatra sy hatsara ny toeram-piompiana izy ary nangataka toro-hevitra ka tonga nitsidika ny toeram-piompiana ny ekipa DRPEB Atsimo Atsinanana ny 25 Jolay 2025. Ny famokarana zana-trondromoa tena mahaliana azy mba hamatsiana ireo mpiompy eny amin’ny manodidina. Miisa 9 moa ankehitriny ny dobony taorian’ny fanitarana izay ataony. #MPEB #DRPEB #Atsimo_Atsinanana

𝗙𝗮𝗻𝗸𝗮𝗹𝗮𝘇𝗮𝗻𝗮 𝗻𝘆 𝗔𝗻𝗱𝗿𝗼 𝗠𝗮𝗻𝗲𝗿𝗮𝗻-𝘁𝗮𝗻𝘆 𝗺𝗼𝗺𝗯𝗮 𝗻𝘆 𝗔𝗹𝗮 𝗛𝗼𝗻𝗸𝗼 ( #JIM ) 𝟮𝟬𝟮𝟱 𝘁𝗮𝗼 𝗮𝗺𝗶𝗻’𝗻𝘆 𝗔𝘁𝘀𝗶𝗺𝗼 𝗔𝗻𝗱𝗿𝗲𝗳𝗮𝗻𝗮.

Zava-dehibe sy manandanja amin’ny seha-pihariana Jono sy ny Toekarena Manga ny ala Honko satria dia tsy vitan’ny manome toeram-ponenana ho an’ny karazana zava-manan’aina maro, fa manampy ihany koa amin’ny fanalefahana ny fiovaovan’ny toetr’andro amin’ny alàlan’ny fitehirizana karbaona sy ny fiarovana ny morontsiraka. Noho izany ny fiarovana azy dia zava-dehibe ho an’ny tontolo iainana sy ny hoavin’ny taranaka. Tontosa tamin’ny fomba ofisialy ny 26 Jolay 2025 teo tao amin’ny Fkt Ambondrolava, ao anatin’ny Kaominina Ambanivohitra Belalanda, ny fankalazana ny « Andro Maneran-tany ny Ala Honko. Ny lohahevitra nentina nankalazana izany tamin’ity taona 2025 ity dia ny hoe  » 𝑯𝒐𝒏𝒌𝒐🌱 𝒗𝒂𝒉𝒂𝒕𝒓𝒚 𝒏𝒚 𝒂𝒊𝒏𝒂 𝒎𝒊𝒂𝒓𝒐 𝒏𝒚 𝒛𝒂𝒗𝒂-𝒎𝒂𝒏𝒂𝒏’𝒂𝒊𝒏𝒂 𝒎𝒃𝒂 𝒉𝒂𝒉𝒂𝒇𝒂𝒉𝒂𝒏𝒂 𝒎𝒊𝒂𝒅𝒚 𝒂𝒎𝒊𝒏’𝒏𝒚 𝒇𝒊𝒐𝒗𝒂𝒐𝒗𝒂𝒏’𝒏𝒚 𝒕𝒐𝒆𝒕𝒓𝒂𝒏𝒅𝒓𝒐 ». Io lohahevitra io dia nanamafisana ny anjara toerana lehibe hananan’ny ala Honko amin’ny fitazonana ny fifandanjan’ny tontolo iainana sy ny fiarovana ny zava-manan’aina isan-karazany. Manodidina ny 400 ha eo eo ny velarana ala honko ao amin’ny Kaominina Ambanivohitra Belalanda ankehitriny ary tamin’ny faha 04 Jona 2010 tany ho any no nanaovana ny famindram-pitantanana io ala io amin’ireo mponina eny ifotony ka ny ONG HONKO SALAMA sy MIHARI no mpitarika sy mpanohana ny VOI MAMELO HONKO amin’ny fitantanana izany. Na izany aza dia misy ihany ny olana indrindra eo amin’ny fihenan’ny rano manondraka ny ala Honko noho ny fihenan’ny lalan-drano izay miteraka fiantraikany ratsy amin’ny fahasalaman’ny ala, satria ny rano no singa fototra ilaina amin’ny fitomboan’ny Honko .Noho izany nanaitra ny fitondrana sy ny mpiara-miombon’antoka rehetra ny filohan’ny VOI MAMELO HONKO mba hifanome tanana handray amin’ny fanalalana ireo lalan-drano ireo. Nandray anjara tamin’ity fankalazana ity ireo tompon’andraikitra isan-karazany, anisan’izany ny Lefitry ny Ben’ny Tanànan’ny Kaominina Belalanda, ny Filohan’ny Fkt Ambondrolava, ny DRPEB ny DREDD, ary ny fikambanana tsy miankina toy ny Reef Doctor, VARUNA, ACB, ary ACH. Ny fanatrehan’ireo mpandray anjara ireo dia nanamafy ny fiaraha-miasa eo amin’ny fitondrana, ny fiaraha-monina, ary ny sehatra tsy miankina amin’ny fiarovana ny ala Honko. #MPEB #JIM #DRPEB #DREDD #Atsimo_Andrefana #ONG_HONKO_SALAMA #MIHARY #VOI_MAMELO_HONKO #Reef_Doctor #VARUNA #ACB #ACH

JIM 2025 : FIZARANA FAMPITAOVANA MARO ISAN-KARAZANY / FAMINDRAM-PITANTANANA TGRN / FIZARANA MARIM-PANKASITRAHANA 26 Jolay 2025 . Maintirano, Faritra Melaky

Nandritra ny Fankalazana ny Andro manerantany ho an’ny Rohivoary ala Honko hatrany dia nozaraina fampitaovana maro ireo mpanjono eny ifotony AVY amin’ny orinasa misehatra amin’ny Jono makamba entina hanatsarana ny foto-piveloman’ireo ireo ,ireo izay manantateraka ny fanaraha-maso sy fanarenana ny ala Honko ary ho an’ireo Tompon’andraikitra isan-tsokajiny eny ifotony manantateraka ny asa fampandrosoana ao an-toerana. Isaorana arak’izany ireo orinasa izay nanome ny fampitaovana toy ny PEX ,SMP ,RFO, PNB … Tanteraka soamatsara tsara nandritra izany koa ny Famindram-pitantanana ny ala Honko eo amin’ireo Vondron’olona ifotony #TGRN Teo anatrehan’ny Minisitra mirahalahy mianaka A/toa MAHATANTE Paubert sy A/toa ANDONIRINA Max Fontaine. Farany ny fanomezana Marim-pankasitrahana ho an’ireo izay nandray anjara mavitrika tamin’ny fanarenana ny ala Honko izay tena zava-dehibe amin’ny fampaharetana ireo zava-manan’aina rehetra anaty rano  Ary amin’ny fanamafisana ny fahafahantsika miatrika ny fiovaovan’ny toetrandro. #MPEB #MEDD #JIM2025 #FIZARANA_FITAOVANA. #MAINTIRANO_FARITRA_MELAKY.

Befotaka, Kaominina Nosy Be,Faritra DIANA.Tahiry iombonana « GEC na « Groupe d’Epargne Communautaire » La cle telo.

Ho fanatsarana ny velon-tenan’ireo mpanjono sy hisorohana ny fahasahiranana ara bola mahazo azy ireo mandritra ny fotoana hikatonan’ny rano sy ny tsy fahafahana manao ny asa dia namorona ny tahiry iombonana na G.E.C izy ireo.Sehatra natao hifampitaizana amin’ny fahaizana mitantam-bola.Fomba iray ihany koa natao hifampitsinjovana amin’ny lafiny sosialy sy hahafahana miaro sy manatsara ny tontolo iainana.Arak’izany dia nanao ny zaikabe tao Befotaka, kaominina Nosy Be, Faritra DIANA ireo mpikambana GEC miisa 38 tao an-toerana ny faha 23 Jolay 2025 lasa teo. Nandritra izany no nanehoany ny firaisankina sy fifankatiavana niaraka tamin’ireo solontenam-panjakana any an-toerana.Teny filamatr’izy ireo rahateo ny hoe »Fitiavana Fahendrena,Fandeferana. » #MPEB #CirPEB_NosyBe #Zaikabe #GEC_La_Clé_Telo

JIM 2025 : FANARENANA NY ALA HONKO TAO AMIN’NY FONKOTANY AMPASIMANDORO

Tafiditra anatin’ny Fankalazana hatrany ny Andro manerantany ho an’ny rohivoary ala honko (#Jim) dia nitohy tamin’ny fanarenana ny ala Honko tao amin’ny Fokontany Ampasimandroso izany Anio 27 Jolay ka Zanaka Honko antsoina hoe #Tangambavy ( Ceriops tagal) miisa 30 000 no voavoly tamin’izany . zava-dehibe ny Fanarenana indray ireo Ala honko satria miantoka tanteraka amin’ny fiarovana ny tontolo iainana an-dranomasina no toerana fanatodizana sy fitomboan’ny hazandrano toy ny makamba, drakaka sy ny sisa izay miantoka ny velontenan’ireo mpanjono ifotony no ahitan’ireo mpanjono madinika na vaventy sy ny Faritra tombontsoa. Fa indrindra ny hampaharitra izany ho an’ny taranaka fara-mandimby . Ity Hetsika fanarenana ala Honko ity ihany koa no nentina namaranana ny Fankalazana ny Andro manerantany ho an’ny rohivoary ala honko izay Notanterahina Teto Maintirano. Nifandrimbona nanatanteraka izany ny Minisitry ny Jono sy ny Toekarena Manga (#𝗠𝗣𝗘𝗕) MAHATANTE Paubert, ny Minisitry ny Tontolo iainana sy ny Fandrosoana Lovainjafy (#𝗠𝗘𝗗𝗗) ANDONIRINA Max Fontaine, ny mpiara-miombon’antoka isan-tsokajiny, ny sivily sy miaramila ,ireo Tompon’andraikitram-panjakana eny an-toerana, ireo fikambanan’ny mpanjono, ireo Tanora rehetra sns…. « HONKO , VAHATRY NY AINA , MIARO IREO ZAVAMANANAINA, MANAMAFY NY FAHAFAHANTSIKA MIATRIKA NY FIOVAOVAN’NY TOETRANDRO » #MPEB #MEDD #JIM2025 #MAINTIRANO #FARITRA_MELAKY #FANARENANA_ALA_HONKO

‎Ampefy, Faritra Itasy : Atrikasa fankan-kevitra miaraka amin’ireo mpisehatra nationaly momba ny famolavolana ny tetikasa fitaratra « Jono makamba maharitra, ao amin’ny faritra Menabe »

Notanterahina ny 24 sy 25 Jolay 2025 ny atrikasa fankan-kevitra miaraka amin’ireo mpisehatra nationaly momba ny famolavolana ny tetikasa fitaratra « Jono makamba maharitra, ao amin’ny faritra Menabe » izay tafiditra ao anatin’ny tetikasa BIODEV 2030 andiany faharoa. Marihina fa ity tetikasa ity dia eo ambany fiahian’ny Ministeran’ny Jono sy ny Toekarena Manga ary ny Ministeran’ny Tontolo Iainana sy ny Fampandrosoana Lovain-jafy. Ity ny atrikasa faha telo izay notanterahina tany Ampefy taorian’ny atrikasa indroa miantoana izay fankan-kevitra teny ifotony notanterahina tany Morondava. Mpitantsoroka ny WWF sy ireo mpiara- miombonantoka ary ny tetikasa BIODEV 2030. Nanokatra ny izany tamin’ny fomba ofisialy A/toa Tale Jeneraly ny Jono sy ny Fampamokarana ny Ati-rano eo anivon’ny Ministeran’ny Jono sy ny Toekarena Manga. Ireo Mpandray anjara kosa dia nahitana an’ireo avy amin’ny sehatra rehetra (Administration, ny solontenan’ny Ben’ny tanàna avy amin’ny faritra Menabe, mpanjono madinika, ny mpanangom-bokatra, ny GAPCM sy ny orin’asa vaventy mpidrandraka makamba, ny fiaramonim-pirenena, ny ONG,…) mahakasika ny jono makamba no, ary nahitana ireo mpisehatra avy amin’ny faritra Menabe. Ny BCPA moa no mpanamahay voafidy hamolavola ny tetikasa. ‎Nankatoavina tamin’izany ny volavolana tetikasa izay hatsangana, taorian’ny fanitsiana vitsivitsy hifanandrify amin’ny politika nasionaly amin’ny fitantanana ny jono makamba eto Madagasikara. ‎ ‎ #MPEB #MEDD #Jono #makamba_maharitra #WWF #BIODEV2030

DISTRIKAN’NY MAINTIRANO ,FARITRA MELAKY : FANOKAFANA AMIN’NY FOMBA OFISIALY NY JIM 2025

Ala Honko , Vahatry ny aina , miaro ireo zava-manan’aina , manamafy ny fahafahantsika miatrika ny fiovaovan’ny toetrandro  Io no lohahevitra nasongadina mandritra ity Fankalazana ny Andro manerantany ho an’ny rohivoary ala Honko ity . Manao ny ezaka hatrany ireo Ministera Tompon’andraikitra ( MPEB & MEDD ) na ireo mpanjono na ireo Vondron’olona ifotony amin’ny fanarenana sy fiarovana ity rohivoary ity mba hampaharitra azy ho lovain-jafy satria arakaraky ny fiarovana izany no mahabetsaka ireo harena ao anatiny. Tsara ihany koa ny Manamarika fa mifampiankina tanteraka ny asan’ny Ministera 2 Tompon’andraikitra Raha ny ala Honko no resahina. Rehefa Misy ny Ala dia misy rotsak’orana izay mampisy rano ho an’ny sehatry Jono sy ho fiarovana ireo zava-manan’aina rehetra miaina ao aminy #MAINTIRANO_FARITRY_MELAKY #MPEB_MEDD

Fampiofanana manokana ho an’ny Mpanjono sy ireo « Mareyeurs « ao Tsihombe sy Ambovombe, Faritra Androy.

Ezahina hatrany ny hanamafisana ny fahaizan’ny mpanjono sy ireo « mareyeurs  » mba hahafahan’izy ireo manatsara ny vokatra azo avy amin’ny asany izay miantoka ny kalitaon’ny vokatra ary mandray anjara amin’ny fitantanana maharitra ny harena an-dranomasina. Arak’izany dia tontosa tao amin’ny Distrikan’i Tsihombe sy Ambovombe ny fampiofanana izay naharitra herinandro teo izay nanomboka ny faha 18 ka hatramin’ny 24 Jolay 2025 teo izay nahitana mpanjono sy mareyeurs nisitraka izany niisa 119. Fampiofanana ara-teorika ary narahana fampiharana ho fanomezana fahalalana sy fahaizana vaovao ho an’ireo mpandray anjara, hahafahana manatsara ny asany sy ny vokatra azo avy amin’ny jono. Nisy lohahevitra maromaro izay hita fa manan-danja no nozaraina sy nodinihina nandritra ity fampiofanana ity ka anisan’izany: Ny fampahafantarana tamin’ireo mpandray anjara ny fitsipika sy lalàna mifehy ny sehatry ny jono eto Madagasikara eo ihany koa ny fanazavana ny mety ho voka-dratsin’ny fihinanana hazandrano izay mitondra fanampoizinana sy ny fomba hamantarana ny karazana hazandrano mety hiteraka fanapoizinana, ny fepetra ara-pahasalamana tokony harahina rehefa mikirakira ny vokatry ny jono, manomboka amin’ny fanjonoana ka hatramin’ny fivarotana azy. Teo ihany koa ny fanomezana azy ireo ireo teknika isan-karazany hitehirizana ny vokatra sy ny hitazomana hatrany ny kalitaony ary farany dia ny Fampianarana manokana no natokana ho an’ny fanamboarana fitaovam-panjonoana toy ny « Filet ZZ »  » Palangre » sy fomba fanamboarana lakana simba, mba hahafahan’ny mpanjono mitazona ny fitaovany ho amin’ny fampiasana maharitra sy azo antoka. Naneho fahafaham-po sy fankasitrahana ireo mpandray anjara tamin’ity fampiofanana ity, izay nahafahan’izy ireo nianatra teknika vaovao sy nanatsara ny fahaizany. Maro tamin’izy ireo no naneho ny fikasany hampihatra avy hatrany ny fahalalana sy fahaizana azo tamin’ny asany andavanandro. #MPEB #DRPEB_ANDROY #FAO #MIONJO

Kaominina Toamasina II,Distrikan’i Toamasina II,Faritra Atsinanana.

Fanamboarana dobo trondro vaovaon’ny Sekoly fanofanana ho mpiandry Fonja (ENAP). Maro ireo sekoly sy orinasa miara-miasa amin’ny Ministeran’ny Jono sy ny Toekarena Manga ka anisan’izany ny Sekoly fanofanana ho mpiandry Fonja (ENAP) ao Antetezambaro ,Toamasina II. Noho ny fiaraha-miasa amin’ny Fitaleavam-paritry ny Jono sy ny Toekarena Manga (DRPEB) Atsinanana sy ny ENAP dia dobo trondro miisa 18 no haorina ao amin’ny tanin’ny sekoly izay samy manana velarana 240 metatra toradroa avy. Ny DRPEB no manara-maso sy manome toromarika mikasika ireo teknika fanamboarana azy.Karaza n-trondro tilapia « Oreochromis niloticus » no hompiana amin’izany izay tena mety amin’ny toe-tany any amin’iny faritra iny.Hantenaina araka izany fa hampitombo ny vokatra trondro any an-toerana ny fahavitany ary ho modely azo halaintahaka eny ifotony ka haharesy lahatra ny maro hisehatra amin’izany fiompiana trondro izany. #MPEB #DRPEB #Atsinanana #ENAP #Tantsoroka_sy_fiarahamiasa #Fiompiana_Trondro #Asa_Manga