Hotel Colbert,Antananarivo 04 – 05 Septambra 2025 𝐀𝐭𝐫𝐢𝐤𝐚𝐬𝐚 𝐦𝐢𝐤𝐚𝐬𝐢𝐤𝐚 𝐧𝐲 𝐟𝐚𝐦𝐩𝐚𝐡𝐚𝐟𝐚𝐧𝐭𝐚𝐫𝐚𝐧𝐚 𝐧𝐲 𝐟𝐢𝐭𝐚𝐨𝐯𝐚𝐧𝐚 𝐞𝐧𝐭𝐢𝐧𝐚 𝐡𝐚𝐧𝐝𝐫𝐞𝐟𝐞𝐬𝐚𝐧𝐚 𝐧𝐲 𝐟𝐚𝐦𝐩𝐢𝐫𝐨𝐛𝐨𝐫𝐨𝐛𝐨𝐚𝐧𝐚 𝐧𝐲 𝐭𝐨𝐞𝐤𝐚𝐫𝐞𝐧𝐚 𝐦𝐚𝐧𝐠𝐚 𝐦𝐚𝐡𝐚𝐫𝐢𝐭𝐫𝐚

     Ny toekarena manga izay ahitana ny sehatra fitaterana an-dranomasina, fitrandrahana solika ambany ranomasina,ny fizahan-tany, ny ny jono ary ny fampamokarana ny atirano dia manana anjara toerana lehibe amin’ny fampandrosoana ny toekarena an’i Madagasikara. Anisan’ny andraikitra lehibe sahanin’ny Ministeran’ny Jono sy ny Toekarena Manga manokana ny fandrindrana sy fampiroboroboana izany toekarena Manga izany sy ny fitantanana ny ranomasina eto Madagasikara.

     Amin’ny ankapobeny dia misy ireo dingana efa vita toy ny fametrahana ireo drafitra sy paikady nasionaly fampiroboroboana ny toekarena manga tao anatin’izay 4 taona nijoroan’ny Ministera izay ka ilaina arak’izany ny fametrahana tondro ahafahana mandrefy ny fivoaran’izany toekarena manga izany sy ny fandrefesana ny fampiharana ireo paikady napetraka.

    Nisy arak’izany ny atrikasa nasionaly izay natao tao amin’ny Hotel Colbert, Antananarivo, androany 04 Septambra 2025 , atrikasa mikasika ny fampahafantarana ny fitaovana entina handrefesana ny fampiroboroboana ny toekarena manga maharitra na (𝘼𝒕𝙚𝒍𝙞𝒆𝙧 𝙙𝒆 𝒑𝙧𝒆́𝙨𝒆𝙣𝒕𝙖𝒕𝙞𝒐𝙣 𝙙’𝙪𝒏 𝒐𝙪𝒕𝙞𝒍 𝒅’𝒆́𝙫𝒂𝙡𝒖𝙖𝒕𝙞𝒐𝙣 𝙘𝒐𝙢𝒑𝙖𝒓𝙖𝒕𝙞𝒗𝙚 𝙙𝒆 𝒍’𝒆́𝙘𝒐𝙣𝒐𝙢𝒊𝙚 𝙗𝒍𝙚𝒖𝙚 𝙙𝒖𝙧𝒂𝙗𝒍𝙚 – 𝙈𝒂𝙙𝒂𝙜𝒂𝙨𝒄𝙖𝒓) izay ahitana ireo mpisehatra marobe ao amin’ny Komity Marolafy ho amin’ny fandrindrana ny Toekarena Manga (Cluster Economie Bleue) anisan’izany ny solontena avy amin’ny ministera sy andrim-panjakana isan-karazany, ireo mpiara-miombon’antoka ara-teknika sy ara-bola, ny oniversite sy ny ivon-toeram-pikarohana, ny sehatra tsy miankina, ary koa ny solontenan’ny fikambanana ifotony.

    Ny tanjona dia ny hizarana sy hampahafantatra ilay fitaovana fanombanana vaovao, miaraka amin’ny vokatra voalohany azo tamin’ny fampiasana azy manokana teto Madagasikara.

     Aorian’izao atrikasa dia antenaina ny fisian’ny fanamafisana ny fahalalana sy ny fahaizan’ireo mpandray anjara ary koa ny fametrahana sori-dalana sy drafitr’asa mazava tsara hanampy amin’ny fandrindrana sy fanaraha-maso ny ezaka rehetra amin’ny fampiharana ny paik’ady nasionaly momba ny toekarena manga ary hiantohana fa ny fampandrosoana ny toekarena manga eto Madagasikara dia hahasoa ny firenena manontolo sy ny taranaka ho avy. Marihina fa ny WWF no nanao ny tantsoroka rehetra nafahana nanatontosa izao atrikasa izao.

#MPEB #ClusterEconomieBleue #WWF #SNEB