Kaominina Ambanivohitra Antsohimbondrona, Distrikan’Ambilobe, Faritra DIANA. Fampiofanana ireo polisin-drano hanamafy ny fanarahamaso sy fiarovana ireo harena voajanahary eny ifotony.
Miara-mietana amin’ny fiarovana ny harena voajanahary ao aminy ireo vahoaka eny ifotony. Hahafahana miatrika izany dia ilaina ny fiofanana ara-teknika sy araky ny lalana mba hampahomby izany fandraisan’andraikitra izany.Araka izany dia polisin-drano(CCS) miisa 21 mianadahy no nanaraka fiofanana nandritra ny sivy (09) andro nanomboka ny faha 04 hatramin’ny 12 aogositra 2025 teo.Tao aorian’izany dia notolorana fanamarinam-pahavitan’ny fiofanana izy ireo teo ampamaranana ny fiofanana. Tonga nitarika ny lanonana ny lehiben’ny Distrikan’Ambilobe mpisolo toerana , notronin’ny sekretera jeneraly ny kaominina antsohimbondrona, ireo solontenan’ny Ministera eny ifotony toy ny lehiben’ny Fari-piadidian’ny Jono sy Toekarena Manga #CirPEB# Ambilobe,ny avy ao amin’ny CSP Nosy Be,ny avy ao amin’ny Zandarimariam-pirenena ary ny avy amin’ny WCS izay nanome tantsoroka nahafahana nanatontosa izao fiofanana izao. #MPEB#CirPEB#Cantonnement _EFAmbilobe#CSP #WCS#CCS#GN
Kaominina ambanivohitra Ampampamena sy Bemanevika Andrefana, Distrikan’Ambanja, Faritra DIANA. Fanentanana ireo mpanjono momba ny fanatavezana Drakaka.
Iray amin’ireo hazandrano manana lanja ara-toekarena ary iray amin’ireo vokatra aondran’i Madagasikara any ivelany ny Drakaka.Hahafahana manampy ireo vahoaka eny ifotony, ny Ministeran’ny Jono sy ny Toekarena Manga#MPEB# dia mametraka paikady hahazoana vokatra mamaly ny filàn’ny tsena iraisam-pirenena sy hoan’ny mpanjifa Malagasy ihany koa. Noho izany dia mpanjono miisa 35 avy ao amin’ny Kaominina ambanivohitra Ampampamena sy Bemanevika Andrefana no noentanin’ny lehiben’ny Fari-piadidian’ny ny Jono sy ny Toekarena Manga #CirPEB ao ambanja ka namporisihina hisehatra amin’ny fanatavezana drakaka ny faha 13 Aogositra 2025 teo .Vonona ny handray ny fiofanana ireo mpanjono ka ny CirPEB no handray an-tanana ny fampiofanana ary ny ONG WCS no manome tan-tsoroka amin’ny hahafahana manatanteraka izany. #MPEB #CirPEB #Ambanja #WCS #Fanatavezana_drakaka
Kaominina Ambanivohitra Ambahatrazo, Distrikan’i Manakara, Faritra Fitovinany. Akon’ny Fampiofanana momba ny fiompiana trondro.
Tontosa ny faha 16 Aogositra 2025 teo tao amin’ny Fiangonana FJKM Ambahatrazo ny fampiofanana mahakasika ny teknika fiompiana trondro Tilapia sy Karpa . Ity fiofanana ity dia notanterahina niaraka tamin’ny ekipa avy amin’ny Fitaleavana misahana ny Fampamokarana ny Atirano (Direction de l’Aquaculture) ao amin’ny Ministeran’ny Jono sy ny Toekarena Manga . Maro dia maro ny Olona liana tamin’ity hetsika ity izay nahitana mpandray anjara niisa 215 ka ny sasany tamin’izy ireo dia efa manana dobo-trondro ary efa misehatra amin’ny fiompiana trondro. Nandritra ny hetsika dia naneho ny fahavononany hanohy ny fampandrosoana ny sehatry ny fiompiana trondro ao an-toerana ny Ben’ny Tanànan’ny Kaominina Ambanivohitra Ambahatrazo sy ny mpiasa eo anivon’ny kaominina. Anisan’ny tanjona ny hampiroboroboana ny fiompiana trondro ho fomba iray hiantohana ny fanjariana ara-tsakafo, hampitomboana ny fidiram-bolan’ny isan- tokantrano, ary hanohanana ny fampandrosoana ara-toekarena ao amin’ny kaominina. #MPEB #DRPEB_Fitovignany #PPSPAS #Fiompiana_trondro #Asa_Manga #Toekarena_Manga
Kaominina Ambonivohitra Ambositra, Distrikan’Ambositra, Faritra Amoron’i Mania. Festival VOLAMBETOHAKA andiany faha-15 :Hetsika ara-kolontsaina mampiavaka an’Amoron’ i Mania.
Mifamatotra ny fampandrosoana sy ny sosialy fa indrindra ny kolontsaina.Izany indrindra no mahatonga ny Talem-paritry ny Jono sy toekarena Manga #DRPEB Amoron’i Mania nandray anjara tao anatin’ny kaomisiona mpikarakara ny volambetohaka andiany faha 15 izay tanterahina mandritra ny efatra andro ao amin’ny distrikan’Ambositra, renivohitry ny Faritra Amoron’i Mania nanomboka ny faha 14 Aogositra 2025 ka tsy hifarana raha tsy ny faha17 Aogositra 2025 izao. Hetsika ara-kolontsaina fanao isaky ny roa (2) taona saingy efa fito taona lasa no nisy izany farany ka izao fohazina izao indray. Mitarika ny lanonana mandritra izany ny Governoran’ny faritra Amoron’i Mania sy ny Prefektiora ka hotronin’ireo olo-manakaja maro sivily sy miaramila ary ireo tompon’andraikitra maro avy ao an-toerana.Hetsika ara-javakanto mampiavaka ny faritra no ho hita mandritra izany ka voasolo tena avokoa ny Distrika efatra mandrafitra ny faritra miaraka amin’ny departemantan’i Imadiala. Izao hetsika izao dia natao mba hitarafana ny fiaraha-mientan’ireo tompon’andraikitra rehetra any an-toerana amin’ny fampandrosoana ka isan’izany ny fampiroboroboana ny sehatry ny fiompiana trondro izay singa iray lehibe mandritra ny Toekarena Manga. #MPEB #DRPEB #Amoron_i_Mania #VOLAMBETOHAKA #fiompiana_trondro.
Kaominina Ambanivohitra Ambilobe, Distrikan’Ambilobe , Faritra DIANA. Atrikasa fametrahana ny drafi-panarenana ny Ala Honko.
Ny Ala Honko no toeram-panatodizana sy fitomboana ary fonenan’ny hazandrano.Ny Ministeran’ny Jono sy ny Toekarena Manga (MPEB )miaraka amin’ny Ministeran’ny tontolo iainana sy ny fandrosoana Lovain-jafy (MEDD) dia manao Zava-dehibe ny fikojakojana izany ala honko izany.Tontosa tao Ambilobe, Faritra DIANA ny faha 14 aogositra 2025 teo ny atrikasa nanoloran’ireo mpanamahay ny vokatry ny fanadihadiana izay nataony mikasika ny ala Honko amin’ny ankapobeny teo anatrehan’ny DRPEB sy DREED nisolontenan’ny ministera roa tonta . Nandritra izany no nisian’ny asam-baomiera nanangonana ireo hevitra sy antotan’isa ho famolavolana ny drafi-panajariana ny Ala Honko ao amin’ny faritra DIANA izay haharitra mandritra ny 10 taona.Zava-dehibe ity drafitra ity noho izy fitaovana hahafahana mandray fanapahan-kevitra mikasika ny tontolon’ny Ala Honko.Nanome ny tan-tsoroka nahafahana namolavola sy nanatontosa izao atrik’asa izao nanao ny WWF. #MPEB #MEED #DRPEB #DREED #DIANA #WWF #Drafi_panajariana_Ala_honko #Jono_maharitra
Kaominina Ambanivohitra Analavory, Distrikan’i Miarinarivo ,Faritra Itasy : Akon’ny fampiofanana fiompiana trondro eny ifotony.
Manana toe-tany mafana mety amin’ny fiompiana trondro ny faritra Itasy misy ny Kaominina Analavory ,distrikan’i Miarinarivo. Tantsaha niisa 72 mianadahy avy ao amin’ny Fkt Marosoka, Kaominina Analavory no nisitraka ny fampiofanana mikasika ny fiompiana trondro maimaimpoana izay teo ambany fitarihan’ny ekipan’ny Fitaleavam-paritry ny Jono sy ny Toekarena Manga #DRPEB Itasy ny faha 14 aogositra 2025 teo. Novelabelarina nandritra izany ireo teknika fototra ilaina amin’ny fiompiana trondro an-dobo sy antanim-bary. Tsapa fa resy lahatra ireo mpiofana fa mahavelona tanteraka ny fiompiana trondro any an- toerana ary hahitana tombontsoa maro na ara-pihariana na ara-pahasalamana. #MPEB #DRPEB_Itasy #Fiompiana_trondro #Asa_manga.
Fampiroboroboana ny Asa Manga amin’ny alalan’ny Fiompiana trondro.
Tontosa ny faha 14 Aogositra 2025 tontolo andro teo tao amin’ny Tranompokonolona Antsenakely ,Kaominina. Ambonivohitra Antsirabe, Distrikan’ Antsirabe I,Faritra Vakinankaratra ny “Séminaire piscicole” izay natrehin’ireo mpikambana ao amin’ny DRPEB Vakinankaratra sy ny ekipa avy ao amin’ny orinasa Arbiochem izay niara-nikarakara sy nanatanteraka ity hetsika ity. Nahitana fanovana kely ny paikady nandritra ity seminera ity ka ny tanjona napetraka dia ny hanampy ireo mpandray anjara ho lasa mpandraharaha mahomby eo amin’ny sehatry ny Toekarena Manga sy ho matihanina afaka mampitombo ny vokatra trondro sy ny fidiram-bolany. Nandritra ny seminera no nampitaina tamin’ny mpandray anjara ireo pitsopitsony ara-teknika sy ara-pitantanana ilaina mba hahazoana vokatra tsara amin’ny fiompiana trondro. Ankoatra izany, nampahafantarina ihany koa ireo lalàna mifehy sy ny dingana tsy maintsy arahina raha tia ho tonga mpiompy trondro matihanina sy mahomby. Taorian’ny fampitana ara-teorika dia nisy ny fitsidihana ny ZEP ENSOA izay nanomezana mivantana ny toromarika sy fampahafantarana ilaina rehetra ho fanatsarana ny asa fiompiana trondro. Miisa 95 mianadahy ny mpandray anjara tamin’ity seminera ity ary naneho ny hafaliany sy ny fahafaham-pony tamin’ny fampiofanana azony. Naneho ny fisaorany manokana ho an’ny Minisiteran’ny Jono sy ny Toekarena Manga #MPEB# izy ireo noho ny fanohanana sy ny fandraisana anjara tamin’ity hetsika ity. Nankasitrahana manokana ihany koa ny orinasa #Arbiochem sy ny Kaominin’Antsirabe Renivohitra tamin’ny fiaraha-miasa sy ny fifanomezan-tanana nahomby tamin’ny fandaminana ity seminera ity. #MPEB #DRPEB_Vakinankaratra #Arbiochem #Fiompiana_trondro #Asa_Manga #Toekarena_Manga
Andalambe,Kaominina Ambanivohitra Maroalomainty, Distrikan’Ambovombe, Faritra Androy Fanandramana ny Pirogue en Fibre de Verre
Ny faha 12 Aogositra 2025 teo tao Andalambe, Kaominina Ambanivohitra Maroalomainty ao amin’ny Distrikan’Ambovombe ; Faritra Androy ny nanaovana ny fanandramana voalohany ireo lakana vita amin’ny fibre de verre nohatsaraina. Ireo lakana ireo izay novokarina natao hanampiana ireo mpanjono mba ho fitaovana matanjaka, maivana ary maharitra ho an’ny jono an-dranomasina. Lakana roa karazana moa no nentina nandramana teto dia ny LAKAMBEZO sy ny LAKANJILO, izay samy manana ny toetrany manokana. Raha ho an’ny LAKAMBEZO dia manana toetoetra sahala amin’izao L=6,30m, l=0,6m, creux: 0,70m, Poids moyen à vide:100kg (pirogue), balancier: 45kg, traversier:30kg, capacité:400kg en mer. Ny LAKAMBEZO kosa dia hita fa mety tsara ho an’ireo mpanjono, na dia tsy misy motera hors-bord aza. Na izany aza, raha misy motera, dia tsaratsara kokoa ny fampiasana azy satria somary mavesatra ilay lakana. Ilay LAKANJILO kosa dia hita fa tena tsy mety. Tsy tanteraka mintsy ny andrana tokony hatao satria natahotra ireo mpanjono ny hitondra azy anaty rano.Ny mpanjono mihitsy no naneho ny tahony sy ny tsy fahatokisany ny fahamarinan’ilay lakana, ka tsy nety naka risika hitondra azy any anaty rano lalina. Noho izany tsy vita tanteraka ny fanandramana nokasaina ho an’ity karazana lakana ity. Na dia nahitana fahombiazana aza ny LAKAMBEZO dia mbola misy ny azo hatsaraina ary ny LAKANJILO kosa dia mbola mila fanavaozana lehibe. Izao vokatry ny fanandramana izao dia hanampy ny mpamokatra sy ny mpanjono hiara-hiasa mba hamokatra lakana mahafeno ny filana sy ny zava-misy any an-dranomasina, ka hitondra fampandrosoana ho an’ny sehatry ny jono ao amin’ny Faritra Androy. #MPEB #DRPEB_ANDROY #DRPEB_ANOSY#, #MIONJO #ZARA_SERVICE
Kaominina Manambato, Distrikan’i Taolagnaro, Faritra Anôsy. Fikarohana hampivelarana ny fiompiana trondro eto Madagasikara.
Ankoatran’ny fiompiana trondro an-dranomamy izay efa mahazatra ny ankamaroan’ny olona sady miroborobo fatratra ankehitriny ; ny Ministeran’ny Jono sy ny Toekarena Manga (MPEB) amin’ny alalan’ny rantsa-mangaikany izay miandraikitra ny asa fikarohana sy fampiroboroboana ny fihariana anaty rano toy ny CDA na ny « Centre de Développement de l’Aquaculture » Mahajanga dia manohy ireo asa fikarohana izay hahafahana manitatra izany fiompiana trondro izany amin’ny rano matsaboka sy an-dranomasina. Araka izany dia naka santionany tamin’ireo karazan-trondro antsoina hoe Saroa na « Sarotherodon sp » tao amin’ny Kaominina Manambaro, Distrikan’i Taolagnaro, Faritra Anôsy ny teknisianina avy ao amin’ny CDA Mahajanga sy ny ekipa avy ao amin’ny DRPEB Anôsy ny faha 09 hatramin’ny 11 aogositra teo. Tanjona amin’izao fidinana ifotony izao ny hahafahana manohy ireo asa fikarohana sy hahafantarana misimisy kokoa ny fiaimpiainan’ireto trondro ireto ka hahafahana mampivelatra bebe kokoa ny fiompiana azy manerana ny Nosy. Ny tantsoroka avy amin’ny tetikasa PPSAPS izay vatsian’ny Vondrona Eropeanina no nahafahana nanatontosa ity fidinana ifotony ity ary hantenaina fa hitondra vokatsoa eo amin’ny teknika fiompiana trondro eto Madagasikara ao aoriana kely. MPEB#DRPEB#Anôsy#CDA#Asa_Fikarohana_Fiompiana_Trondro_Saroa# PPSAPS
HORONANTSARY FOHY MAHAKASIKA IREO FAMPIOFANANA TAO AMIN »Y DISTRIKAN’NY MORAFENOBE SY AMBATOMAINTY
Ministère de la Pêche et de l’Economie Bleue MAHATANTE Tsimanaoraty Paubert