Fampiofanana momba ny fiompiana trondro tany Ampandratokana: Fiaraha-miasa eo amin’ny ONG TSIMOKA sy ny DRPEB Ihorombe.
Tontosa ny faha 08 Oktobra 2025 teo ny fampiofanana momba ny fiompiana trondro, izay fiaraha-miasa teo amin’ny ONG TSIMOKA sy ny Direction Régionale de la Pêche et de l’Économie Bleue DRPEB Ihorombe#izay natao tao amin’ny Foiben-toerana Fanofanana Tantsaha tao Ampandratokana, Kaominina Ambanivohitra Ankily, Distrikan’Ihosy, Faritra Ihorombe ity fampiofanana ity. Tantsaha miisa 39 no nanatrika sy nandray anjara tamin’izany. Nifantoka tamin’ny lohahevitra momba ny fiompiana trondro an-tanimbary ny fampiofanana izay natolotra ireto tantsaha niatrika ny fiofanana. Ankoatra izay dia nozaraina ihany koa ireo fomba fanomanana sy ny fitantanana ny sakafon-trondro mba hiantohana ny fahombiazan’ny fiompiana. Ireo lohahevitra ireo dia nampitaina tamin’ny fomba ara-teorika ary narahina fampiharana mba hahafahan’ny mpandray anjara mampihatra avy hatrany ny fahalalana azo amin’ity seha-pihariana izay nosafinidin’izy ireo. Ity hetsika ity dia anisan’ny ezaka lehibe hanohanana ny tantsaha ao amin’ny Faritra Ihorombe, indrindra amin’ny fanatsarana ny fiompiana trondro ho fomba iray hanamafisana ny fanjariana ara-tsakafo sy ny fampandrosoana ara-toekarena eo an-toerana. Ny fiaraha-miasa eo amin’ny ONG TSIMOKA sy ny DRPEB Ihorombe dia manasongadina ny maha-zava-dehibe ny fifanohanana sy ny fampandrosoana maharitra. #MPEB #DRPEB_Ihorombe #ONG_TSIMOKA #Fiompiana_trondro #Asa_Manga #Toekarena_Manga
Kaominina ambanivohitra Lopary, Distrikan’i Vangaindrano, Faritra Atsimo Atsinanana.
Fanentanana mikasika ny fikatonan’ny jono andranomamy. Miovaova isam-paritra ny fotoana ikatonan’ny fotoam-panjonoana andranomamy araka ny voalazan’ny didim-pitondrana navoakan’ny Ministeran’ny Jono sy ny Toekarena Manga. Fitaovam-pifandraisana maro toy ny fanaovana peta-drindrina eny amin’ ireo biraom-panjakana, filazana amin’ny radio ary fanentanana eny ifotony no noentin’ny ekipa avy ao Talem-paritry ny Jono sy ny Toekarena Manga DRPEB Atsimo Atsinanana # ho fanajana ny fotoana fikatonan’ny fanjonoana an-dranomamy any an-toerana mandritra ny iray volana izay hanomboka ny 15 Oktobra ka hatramin’ny 15 Novambra 2025 izay fotoana hanatodizan’ny trondro. Tao aminy Kaominina Lopary no nanatanterahana izany ny faha 07 Oktobra 2025 teo.Tanjona ny hampitomboana ny tahirin’ny hazandrano any an-toerana sy hisitrahan’ireo mpanjono vokatra maro amin’ny fotoana isokafan’ny fanjonoana. #MPEB #DRPEB #atsimo_atsinanana #Fanentanana_ifotony #Fikatonan_ny_Jono_andranomamy #Lopary
Manatantely – Kaominina Soanierana, Distrikan’ny Tolagnaro, Faritra Anôsy : Fandraisana vonjimaika ny Zone d’Émergence Piscicole (ZEP) ao Manatantely.
Notanterahina ny 05 oktobra 2025 ny fandraisana vonjimaika ny fotodrafitrasa “Zone d’Emergence Piscicole (ZEP)” ao Manatantely izay tetikasa lehibe anankiray naorina ho fampiroboroboana ny Toekarena Manga sy hofanohanana ny ara-toekarena sy ara-tsosialy eto amin’ny Faritra Anôsy. Vita tanteraka ny asa fanorenana ity fotodrafitrasa ity ary vonona avy hatrany hiorso amin’ny asa maha ZEP azy toy ny : famokarana zana-trondro mihoatra ny 5 tapitrisa sy trondro matavy manodidina ny 10 taonina isan-taona, fampiofanana ny mponina amin’ny fiompiana trondro. Marihina fa ity fotodrafitrasa ity dia manaraka ny fenitra tanteraka. Ahitana trano famokarana zana-trondro (écloserie), dobo fiompiana, birao fiasana sy trano fiofanana ary toerana fitehirizana rano manana hadiry 20.000m3 ary herinarantra mandeha amin’ny herin’ny masoandro. Hita ato ihany koa ireo fitaovana ilaina rehetra toy ny fitaovana fanaraha-maso ny rano, ny toe-piainan’ny trondro, solosaina, latabatra sy seza ary tabilao fotsy, sns. Izy ity izay iray amin’ny ZEP roa naorina aty amin’ny Faritra Anosy raha to aka ao Ivahona, Distrikan’ny Betroka ny anankiray. Tonga teny an-toerana ny ekipan’ny Fitaleavam-paritry Jono sy ny Toekarena Manga (DRPEB) eto Anôsy niaraka amin’ireo mpiara-miombon’antoka izay nahitana ny avy amin’ny Fiangonana FLM, tomponantoka tamin’ny fanolorana toerana ary ny avy amin’ny Programa Afafi-Sud izay namatsy tamin’ny fanorenana izao fotodrafitrasa izao. #DPEB_Anôsy #ZEP #Pisciculture #FLM #AFAFISud
Kaominina Ambanivohitra Andranofasika, Distrikan’ Ambato boeny, Faritra Boeny. Fandrotsahana Zana-trondro: Fampiroboroboana ny sehatry ny Jono an-tanety.
Notanterahina ny 02 Oktobra 2025 teo tao amin’ny farihin’ Amparihilava, ao amin’ny Fkt Ambalambakisiny, Kaominina Ambanivohitra Andranofasika, Distrikan’i Ambato Boeny, ny fandrotsahana zana-trondro .Zana-trondo Tilapia tsara kalitao miisa 23 000 eo no narotsaka izay natao mba hampiroboroboana sy hanamafisana ny sehatry ny jono an-tanety, izay sehatra manan-danja satria misy olona maro mifototra amin’io asa io ho entiny miavotra sy miatrika ny fampivoarana ny fiainana andavanandro. Ny FI.MPA.MA na ny (Fikambanan’ny Mpanjono Miray Ambalambakisiny), fikambanana avy ao an-toerana izay manjono amin’io ranovory io no nisitraka ity fanomezana zana-trondro ity ary tonga nandray anjara mavitrika tamin’izany ireo tompon’andraikim-panjakana tao an-toerana ka anisan’izany ny Solombavam-bahoaka Ambatoboeny , ny Lehiben’i Distrikan’Ambato Boeny, ny Délégué d’arrondissement Andranofasika, ny Ben’ny Tanana, ny Coordinateur régional FAO ary ny Ekipa avy ao amin’ny DRPEB Boeny sy CDA .Io fiaraha-miasa io dia manamafy ny fiaraha- mientana amin’ny fampiroboroboana ny toekarena manga. Marihina fa ny tetikasa LLD/FAO Biodiversité no nanao ny tansoroka nahazoana ireto zana-trondro ireto. #MPEB #DRPEB_Boeny #zana_trondro #FIMPAMA #Toekarena_Manga #LLD_FAO
Fitsidihana sy Fidinana Ifotony tao amin’ny Distrikan’i Mahajanga II, Faritra Boeny.
Tontosa ny faha-29 Septambra ka hatramin’ny faha-05 Oktobra 2025 lasa teo ny fitsidihana sy fidinana ifotony natao tao amin’ny Kaominina Ambanivohitra Boanamary, Kaominina Ambanivohitra Mariarano, ary Kaominina Ambanivohitra Andranoboka izay samy ao amin’ny Distrikan’i Mahajanga II, Faritra Boeny. Anisan’ny tanjona kendrena nandritra izany ny fanatsarana ny fiveloman’ny mpanjono sy ny fiarovana ny tontolo iainana an-dranomasina. Nandritra ny fitsidihana no Nampahafantarina ireo mpanjono ny fitsipika mifehy ny jono, anisan’izany ny fahazoan-dalana amin’ny fanjonoana, ny fanajana ny fotoana voarara hanaovana ny fanjonoana ary ireo karazana fitaovam-panjonoana tsy azo ampiasaina izay voararan’ny lalana. Tsy adino ihany koa ny Fampiofanana momba ny teknika vaovao sy azo antoka toy ny : Fampiasana teknika fanjonoana amin’ny alalan’ny fampiasana ny “palangre” na palanky. Ny fampianarana ny fomba fanodinana ireo vokatra an-dranomasina amin’ny alalan’ny teknika “fumage” (fanatsatsika), izay ahafahana manatsara ny kalitaon’ny vokatra. Fisorohana mialoha ny loza an-dranomasina izay Nampahafantarina ny fomba famantarana mialoha ny mety ho toetry ny andro amin’ny alalan’ny “panneau SAP” (Systeme d’alerte précoce) ary ny fomba fampiasana fitaovana fiarovana toy ny “gilet de sauvetage” na ny salotra vonjy aina sy ireo fitaovana hafa hanampiana amin’ny fisorohana ny loza mety hitranga any an-dranomasina. Miisa 398 ny mpanjono nahazo tombontsoa tamin’ity fidinana ifotony ity ary fiaraha-miasa teo amin’ny ekipa UGP sy ny DRPEB Boeny (Direction Régionale de la Pêche et de l’Économie Bleue), ny filohan’ny federasionan’ny mpanjono no nahafahana nanao ny fampiofanana. Marihina fa Ity hetsika ity dia vokatry ny fanatanterahana ny bokin’andraikitry ny orinasa mpamokatra makamba toa ny SOMAPECHE, PECHEXPORT ary REFRIGEPECHE OUEST. #MPEB #DRPEB_Boeny #RSE #SOMAPECHE #PECHEXPORT #REFRIGEPECHE_OUEST #Jono_Maharitra
Tranompokonolona Ambohitsilaozana, Distrikan’Ambatondrazaka, Faritra Alaotra Mangoro 𝘼𝙠𝙤𝙣’𝙣𝙮 𝙁𝙖𝙢𝙥𝙞𝙤𝙛𝙖𝙣𝙖𝙣𝙖 𝙢𝙤𝙢𝙗𝙖 𝙣𝙮 𝙁𝙞𝙤𝙢𝙥𝙞𝙖𝙣𝙖 𝙏𝙧𝙤𝙣𝙙𝙧𝙤.
Tontosa androany, 04 Oktobra 2025, tao amin’ny Tranompokonolona Ambohitsilaozana, distrikan’Ambatondrazaka, ny fampiofanana natokana ho an’ireo tanora sy ireo olona liana amin’ny fiompiana trondro sy ny famokarana zana-trondro. Miisa 88 ny mpandray anjara tonga niatrika izany.Niavaka tokoa ity fiofanana ity satria ny ankamaroan’ireo mpiofana dia efa manana mari-pahaizana baccalauréat . Nandritra ny fiofanana, dia naneho ny fandraisany anjara mavitrika ny mpandray anjara rehetra tamin’ny alalan’ny fanontaniana, fifanakalozan-kevitra, ary nampiseho ny hafanam-pony sy ny fanoloran-tenany amin’ity asa ity. Tsy mijanona eto ihany anefa ny fiaraha-miasa eo amin’ny DRPEB Alaotra Mangoro # sy ny fikambanana Ecovers izay niara nisalahy tamin’ny fampiofanana fa araka ny fantatra dia hiroso amin’ny fikarakarana hetsika isan-karazany izy ireo ka anisan’izany ny fankalazana ny Andro momba ny Jono Madinika. Ho fanampin’izay dia hanohy ny fitaizana ireo mpiara-monina izy ireo mba hirotsaka an-tsehatra amin’ny fampandrosoana.Ankoatr’izay dia nisy ireo mpandray anjara no niditra tao amin’ny vovonana Indri indri sy Aika izay fikambanana miahy sy mikajy ny Tontolo Iainana sy ny zahavoahary. #MPEB #DRPEB_Alaotra_Mangoro #Ecovers #Fiompiana_trondro #Asa_Manga #Toekarena_Manga
Fanazavana momba ny jono lamatra na thon eto amintsika sy ny manodidina ny Ranomasimbe Indianina
Misy karazany roa ny lamatra (thon neretique izay kely kokoa sy azontsika malagasy satria mandalo @ sisin’ny morontsiraka sy thon migrateur izay misy karazany maro sy ngeza kokoa ary any amin’ny 34km any no andalovany ary tsy azontsika firy io satria sady ngeza satria misy mahatratra 700kg ny iray no mandeha mafy hatramin’ny 40km/h kanefa kosa tsy voarara isika Malagasy ny hanjono azy.) Protocole de pêche no anaran’ilay ffifanarahana atao izay ny lalana Iraisampirenena UNCLOS no manome alalana antsika hifampiraharaha amin’ireo Firenena hafa na Orinasa any ivelany ho afaka manjono ireo thon migrateur ireo. Tsy varotra ilay izy fa fangatahan-dalana na droit d’accès satria ressources migratrices na koa hoe harena mifindramonina ilay thon migrateur ireo. Firenena maherin’ny 30 no andalovany aty amin’ny Ranomasimbe indianina ka isan’izany i Madagasikara. 3-5 volana izy ireo no mandalo eto amintsika isan-taona raha ohatra 09 volana ao Seychelles Miditra amin’io fifanarahana io isika satria raha tsy omentsika droit d’accès rizareo dia isika ihany no maty antoka satria jonoiny any amin’ny firenen-kafa ilay lamatra. USD394/tonne izany hoe Ar1,800/kg ilay droit d’accès ary io no isan’ny farany ambony aty Afrika. USD186/tonne ao Seychelles, USD227/tonne ao Maurice. Io no aloan’ireo Armateur na tompon-tsambo amin’i Madagasikara. Efa niakatra io satria Mbola USD114 izy ny voalomboalohan’ny taona 2021. Marihina fa ilay vidin’ny solika no tena charge fixe ambony hoan’ireo sambo ireo (manodidina ny 7.000 – 10.000 litres par jour na mihoatra akory azy). 5,4 millions de tonnes ny stock lamatra manerantany raha toa ka 1,2 millions de tonnes ny aty amin’ny ranomasimbe indianina ary 52.000 tonnes no mandalo eto Madagasikara isan-taona. 14.000 tonnes nomentsika an’ny vondrona Eropeanina, 1.500 tonnes an’ny Japan Tuna, 5.000 tonnes Interatun… 800 tonnes isan-taona no hany mba azontsika eto Madagasikara amin’ny alalan’ny REFRIGEPECHE Est. I Japan Tuna no isan’ny accord de pêche farany tsara hatr’izay. Marihina fa renouvellement des accords de pêche avokoa no nataontsika teto Madagasikara fa tsy misy fifanarahana vaovao. Ny Vondrona Eropeanina ohatra dia efa ny taona 1986 no niatombohany. Tsy mitoka-monina raha teo i Madagasikara fa misy fifanarahana amin’ny sehatra hafa izay ifandraisana amindrizareo vahiny. Tsy mifanena velively ireo Mpanjono vaventy lamatra izay manjono any amin’ny 34km miala ny sisindranomasina sy ireo Mpanjono madinika izay matetika latsaky ny 24km no iasany ao anatin’ilay antsoina hoe mer territoriale. Tsy misy Sinoa manjono ny eto Madagasikara nanomboka ny taona 2021. Sambo 25 no ampiasaintsika ankehitriny iadiana amin’ny jono tsy manara-dalana na peche INN. Manana carburant tafakatra ho 1 miliara ariary isan-taona isika hampandehanana ireo sambo ireo. Izay no mahatonga an’i Madagasikara ho isan’ireo Firenena mitarika aty Afrika amin’ny ady atao amin’ny peche INN na pêche illégale. Manampy antsika amin’izany ady izany ny Masoivoho Eropeanina, Amerikanina ary Sinoa sy ireo ONG maro toy ny Global Fishing Watch. Ny redevances izay mitentina Ar34 milliards isan-taona avy amin’ny fanjonoana vaventy dia arotsaka mivantana any amin’ny kitapom-bolam-panjakana fa tsy aty amin’ny Ministera. Ireo indray no akan’ny Fanjakana anaovana ireo Fotodrafitrasa ho fampandrosoana ny Jono amin’ny alalan’ny PIP. Tafakatra ho 177.000 tonnes ny vokatra Jono azo ny taona 2024 raha toa ka 112.000 tonnes ny taona 2021. Niakatra ny vokatra nohon’ny fametrahana ireo paikady maro (réserves marines, aires marines protégées, LMMA, TGRH sns). Tafakatra ihany koa mihoatry ny 07kg isam-batan’olona isan-taona kosa ny fihinana trondro eto amintsika raha toa ka 4,26kg izany ny taona 2021. NB : ny baleines, ny dauphins sns dia tsy harena jonoina izany hoe tsy ressources halieutiques satria tsy trondro izy ireo fa mammifères marins na biby miteraka sy mampinono andranomasina ka tsy ny Ministeran’ny peche no mitantana azy fa ny Ministeran’ny Tontolo iainana satria dia biby arovana manerantany izy ireo. Fehiny : isika Malagasy ihany no maty antoka raha tsy miditra amin’ny accord de pêche satria ireo Firenena manodidina antsika dia manao izany avokoa satria lalana Iraisampirenena no mametraka izany. Mahay zavatra ihany koa ilay Zanahary satria tsy nataony mandalo akaiky ny sisindranomasina ireo lamatra mpifindra monina ireo satria mihinana trondro 30% ny havesany isan’andro (ces thons migrateurs consomment du poisson 30% de leur poids par jour – izany hoe raha 100kg izy dia trondro madinika 33kg isanandro no haniny ka izay no mahatonga azy ireo hifindra monina lava). NB : tsy ny Ministeran’ny Jono no miaro sy miambina ny sisindranomasina fa ny Marine Nationale izay eo ambanin’ny Minisiteran’ny Foloalindrahy izay tena isaorana manokana amin’ny fiarahamiasa hatr’izay. Misaotra namaky Tompoko, Ampanajana, Dr. MAHATANTE Tsimanaoraty Paubert
Mitohy hatrany ny Fampiofanana momba ny Fiompiana Trondro ho an’ny Faritra Ihorombe.
Mitohy hatrany ny ezaka ataon’ny avy ao amin’ny DRPEB Ihorombe # sy ny ekipany tqmin’ny fanatontosana ny fampiofanana manokana ho an’ireo tantsaha tao amin’ny Fkt Morarano, Kaominina Ambanivohitra Antsoha, Distrikan’Ihosy, Faritra Ihorombe. Tantsaha niisa 29 no tonga niatrika izany fampiofanana izany. Nandritra ny fampiofanana dia lohahevitra maro no nozaraina tamin’ireo mpandray anjara ka anisan’izany ny fomba fiompiana trondro an-tanimbary, ny fanamboarana dobon-trondro, ary ny fitantanana ny sakafon-trondro. Ireo lohahevitra ireo dia nosafidian’ny mpikarakara ho fanampiana ireo tantsaha hampitombo ny vokatra sy hanatsara ny fiveloman’izy ireo amin’ny alalan’ny teknika maharitra sy mahomby. Ity hetsika ity dia vokatry ny fiaraha-miasa eo amin’ny DRPEB sy ny DRAE avy ao Ihorombe ary ny ONG TSIMOKA, izay samy manana ny anjara birikiny amin’ny fampiroboroboana sy ny fampandrosoana ny tantsaha avy ao amin’ny faritra. #MPEB #DRPEB #DRAE #Ihorombe #ONG_TSIMOKA #Fikambanan_ny_mpanjono #Asa_Manga #Toekarena_Manga
Kaominina Ambanivohitra Maromitety,Ampasimazava ary Tanamarina sy Kaomininana ambonivohitra Vavatenina ; Faritra Analanjirofo. Fizarana zana-trondro hanohanana ireo mpiompy trondro eny ifotony.
Ny karaza-trondro Tilapia dia isan’ireo trondro mila toetr’andro mafana hahafahany mitombo tsara.Faritra manana izany ny faritra Analanjirofo ka izany no nahatonga ny Ministeran’ny Jono sy ny Toekarena Manga MPEB nizara zana-trondro Tilapia tsara kalitao niisa 15 000 amin’ireo tantsaha 41 tao amin’ny kaominina 4 ao anatin’ny faritra ka ny ekipan’ny Fitaleavam-paritry ny Jono sy ny Toekarena Manga DRPEB Analanjirofo no nizara izany ny faha 28 Septambra 2025 teo izay notronon’ireo ben’ny tanàna ao amin’ireo kaominina ireo. Nanatrika izany ihany koa ny solontenan’ny Solombavambahoakan’i Madagasikara voafidy tao Vavatenina.Nanterin’ny DRPEB Analanjirofo nandritra izany ny teknika fandrotsahana azy hialana amin’ny fahafatesan’ireo zana-trondro ireo.Tantsoroka avy amin’ny « appui sectoriel » no nahafahana nanatanteraka izany .Antenaina fa hampitombo hatrany ny vokatra trondro any an- toerana izao hetsika izao. #MPEB #DRPEB #Analanjirofo #Zana_trondro_tilapia #PPSPAS
Kaominina Ambanivohitra Tsifota,Distrikan’i Toliara II , Faritra Atsimo Andrefana. Komity Mpanantanteraka ny Dina (KMD): nomena fiofanana sy fahaiza-manao.
Ny fandraisana anjara mavitrika sy ny fanoloran-tenan’ireo mpikambana ao amin’ny KMD dia maneho ny finiavana hanohy hatrany ny asa fiarovana sy fampandrosoana eo amin’ny faritra .Ho fanohanana azy ireo dia notontosaina ny 26 hatramin’ny 28 Septambra 2025 teo tao amin’ny kaominina ambanivohitra Tsifota, ao amin’ny distrikan’i Toliara II, ny fanofanana sy fanamafisana ny fahaiza-manao ho an’ireo mpikambana ao amin’ny Komity Mpanatanteraka ny Dina (KMD) ao amin’ny faritra arovana Sambele. Ity Dina ity dia efa nahazo fankatoavana avy amin’ny Fitsarana Ambaratonga Voalohany tao Toliara, ka manamafy ny maha-ara-dalàna azy amin’ny fitantanana ny faritra arovana. Miisa 16 ireo nandray anjara tamin’ity fiofanana ity, ka 14 amin’izy ireo dia lehilahy ary 2 kosa vehivavy izay naneho ny fanoloran-tenany hitantana tsara ny faritra arovana. Nahitana solontena avy amin’ny sehatra samihafa ireo tonga nanatrika ity fotoana ity ka anisan’izany ny Solotenan’ny Lehiben’ny Distrikan’i Toliara II, ny Lefitry ny Ben’ny Tanànan’i Tsifota, ny mpikambana ao amin’ny CSP (Centre Surveillance des Pêches ), ny Lefitry ny Lehiben’ny Fkt, ny Filohan’ny Fikambanan’ny Sambele, ary ny solontenan’ny ONG Blue Ventures. Ny lohahevitra nampitaina nandritra ny fiofanana dia ny fampahafantarana ny andininy sy fitsipika voafaritra ao anatin’ny Dina ankoatr’izay dia nisy koa ny fampianarana momba ny fomba fanao mialoha, mandritra, ary aorian’ny kabary, mba hiantohana ny fahombiazan’ny fifampiresahana sy ny fandraisana fanapahan-kevitra. Nampianarina ihany koa ireo antontan-taratasy ilaina rehetra ampiasaina eo anivon’ny KMD. Ny fiofanana dia niafara tamin’ny fampiharana ny zavatra noratovina ka noharina tamin’ny alalan’ny zavamisy eo an-toerana. Marihina fa ny ONG Blue Ventures, izay efa ela mifanome tanana amin’ireo vondrom-piarahamonina eo an-toerana amin’ny fitantanana maharitra ny harena voajanahary, no anao ny tantsoraka nahafahana nanatontosa ity fiofanana ity. #MPEB #DRPEB_Atsimo_Andrefana #KMD #ONG_Blue_Ventures